Arantxa Arza eta Felix Zubia

Kazetaritza Saria

Osasun Etxea (Euskadi Irratia)

Arantxa Arza kazetariak eta Felix Zubia medikuak osasun-kontsulta zabaltzen dute igande goizero Euskadi Irratian. Saioak entzuleei kalitatezko zerbitzu publiko eredugarria eskaintzen diela azpimarratu nahi du epaimahaiak, bereziki COVID19ak mundu zabalean eragindako datu eta iritzi-anabasaren testuinguruan. Zer den alea eta zer lastoa bereizten lagundu duen erreferente informatiboa bilakatu da Osasun Etxea irratsaioa. Beraien zeregina gainera ez da koronabirusaren nondik norakoak azaltzera eta argitzera mugatu; izan ere, entzuleek beste edozein gaixotasunaz helarazitako kezka eta zalantzei erantzun diete, beti zehaztasunez, erraz ulertzeko moduko hizkera erabiliz eta gizatasunezko tratu pertsonalizatua lehenetsiz.

Miel Anjel Elustondo

Kazetaritza Saria

Tonban ehortzirik testu sortagatik (Berria)

Elustondok aspaldi frogatua du bere elkarrizketatzaile sena euskarazko prentsa idatzi nahiz ikus-entzunezkoetan. Honako honetan, koska bat estuago egin du, hildako pertsonak elkarrizketatuz aurtengo udako Berria egunkariarentzat. Jite eta etorki desberdinetako solaskideak hautatu ditu kazetariak sail honetarako: Marie-Louise Lasserre maki zuberotarra, Mikaela Portilla historialari arabarra, Robert Laxalt jatorri euskalduneko idazle estatubatuarra, Jon Mirande euskal idazle paristarra, Zumalakarregiren alarguntsa Pankrazia Ollo eta Yon Etxaide idazle donostiarra. Dokumentazio lana, pertsonaiarekiko hurbilketa eta egiantzekotasun formala nabarmentzen dira fikzioaren eta kazetaritzaren arteko mugak hausten dituen sail honetan. Testu sorta honetan ere Elustondok agerian utzi du bere ibilbide luzean erakutsia duen kalitatea.

Albiste Faktoriako lantaldea

Kazetaritza Saria

Albiste Faktoria 2019ko irailetik 2020ko iraila arteko tartean egindako saioengatik (Euskadi Irratia)

Gurean eta mundu zabalean joan den irailetik gertatu dena ezagutu eta interpretatzeko talaia informatibo mamitsua izan da euskaldunontzat Euskadi Irratiko Albiste Faktoria..  Epaimahaiko kideentzat Maite Artolak gidatutako irratsaioan nabarmentzeko moduko ahalegina egin dute albisteen jario etengabean entzuleen interesekoak egunero ertz guztietatik jorratzeko; izan ere, Faktoria Albistegiko lantaldeak kazetaritza prestu eta modernoa egikaritu du,  kontakizun hutsa egoki janzteko eta entzuleen hausnarketari bide emateko osagaiak bikaintasunez  konbinatu dituzte: protagonisten ahotsak, datuen bilketa eta lanketa jasoa, analisi sakona eta iritzi zein balorazio askotarikoak. Eta hori dena errespetuzko giroan entzuleei helaraztea lortu dute

“Koronabirusaren azken datuak” lantaldea

Kazetaritza Saria

Koronabirusaren azken datuak atala (Berria)

2020a markatuko duen gertakarian kazetaritzaren baitako adar batek garrantzi berezia hartu du: datu-kazetaritza. Pandemiaren erdian, ikuspegi, kontakizun, balorazio eta iritziez aparte, arlo bat bihurtu da funtsezkoa: zer gertatzen ari den ulertaraztea, etengabe sortzen ari diren datuak aurkeztea, ordenatzea eta interpretatzen laguntzea, anabasa larri baten barruan. Lan hori kalitate bereziz egin du Berria egunkarian Koronabirusaren Azken Datuak izeneko ataletan lan egin duen lan-taldeak. Datuak grafiko eta mapa interaktibo argigarri eta esanguratsuetan emateko gaitasun handia erakutsi du, eta, bereziki, datu horiek interpretatzeko irizpide argi, zehatz eta ongi eraikiak eman ditu, egunez egun. Batetik, Euskal Herriko datu guztien bilketa beti egitea ezinezkoa izan arren, Euskal Herriaren irudi eta jarraipen osotuena eman digu beronek. Horrekin batera, mundu mailako jarraipena egiteko ere erreferentzia sendo, argi eta jarraitua eman du, interpretatzeko tresnak eskaintzeko ahalegin didaktiko nabarmena eginez, soiltasunaren arrastotik mugitu gabe. Guztiarekin, eta martxotik hasita etenik gabe, pandemiaren eguneroko pultsua jarraitzeko iturri zinez egokia izan da, kazetaritza serio bati dagokion argitasun eta zehaztasunez.

CodeSyntax

Komunikazio saria

Egunean behin jokoa

Euskaratik eta euskaraz sortutako 80.000tik gora galdera ditu egun datu-basean tribial estiloko joko honek. Haren helburua da euskara sustatzea eta euskal kultura ezagutaraztea.  Aplikazioak 100.000 deskargen langa gainditzea lortu du eta  horietatik gehienek jokatu izan dute egunero. 2019an 3,5 milioi partida jokatu ziren. Komunikazio-esparrua aldatzera datorren tresna nagusiari (Internet eramangarria duen eskuko ordenagailu-telefonoari) modu irudimentsu eta arrakastatsuan heltzen dion proposamena da. Mugikorrarentzat egina izatean, edozein lekutatik parte har daiteke, gehienez egunean behin eta denbora mugatuan. Joko-jolasaren bitartez euskarazko erabiltzaileen komunitatea eraikitzeko tresna dugu CodeSyntaxek merkaturatu duen APP hau. Azpimarratu behar da taldean jokatzeko aukera ematen duela eta 40.000 talde inguru daudela sartuta jokoan. Hala, dagoeneko komunitate bat bildu da jokoaren inguruan, #eguneanbehin traolarekin sare sozialetan isla duena. Etengabe berritzen doan egitasmo honek, gainera, mugikorrerako aplikazio batek eskain dezakeen aukerak gainditu ditu, erabiltzaileei Youtubez erretransmititutako zuzeneko partidak jokatu eta jarraitzeko aukera emanez.

Ene Kantak

Komunikazio saria

Ene kantak proiektu komunikatiboa, 2019-2020an emandako saltoagatik

Ene kantak haurrentzako euskarazko abesti eta ikuskizunen proiektua 2011n Nafarroan hasi zen disko eta bideoklip multzo batekin. Geroztik, proiektu gisa hazten eta indartzen joan da zuzeneko ikuskizunak gehituz.

2019ko irailean, EITBrekin lortutako hitzarmenaren ondoren, ETB3ri lotutako plataformetan (telebistan, webgunea, app-ean) ikus-entzunezkoetara egokitutako haurrentzako saioa ematen hasi ziren. Saio honen bueltan sortu eta kanal multimedia bidez zabaldutako materiala, eta aurrez Youtuben ikusgai eta entzungai dituzten bideoklip guztiak (milioika ikustaldi hainbatek) erreferente bihurtu dira haurrentzako euskarazko entretenimenduko edukietan.

Pandemia garaian, eta bereziki itxialdian, haurrek ere etxean egon behar izan zutenean, telebista, webgune, sare zein app bidez zabalduta, Ene Kantak-ek paper garrantzitsua jokatu du entretenimendu bidezko euskarazko formazioan. Disko xume bat izatetik hasi, eta ia-ia transmedia bihurtu den proiektu komunikatibo multikanalak 2019-2020 tartean salto handia egin du haurrentzako euskarazko eskaintza indartuz.

Arteman

Komunikazio saria

Lur eta Amets filmaren komunikazio prozesua

Euskarazko marrazki bizidun honek eraman duen promozio kanpaina hautatu dugu komunikazio atalerako, RAKS sariketa hauen arauen funtsa ederki egiaztatzen duelako. Haur eta gazteek Euskal Herriko Historia ezagutzeko lan bikaina eta ludikoa ekoizteaz gain, filma jendartera helarazteko, Arteman enpresak baliabide askorekiko komunikazio plana ere garatu duelako, publizitatea, sare sozialetarako estrategia digital oso bat, bai eta medio fisikoak erabiliz, hala nola hiririk hiri ibili den autobus magikoa. Urrats berritzaileak eraman dituzte beren lana plazaratzeko eta publikoaren parte hartze birala sustatzeko. Lankidetza bideak ere urratu dituen proiektua da, Arteman Komunikazioak komunikazio esperientzia partekatu baitu Elkar, Katxiporreta, Ikastolen Elkartea eta Lotura Films-ekin.

Mendiak eta Herriak elkartea, Et Incarnatus Orkestra eta Sorland Komunikazioa

Komunikazio saria

Urmuga proiektuaren spota

Aurtengo uztail-abuztuetan euskal mendizale eta musikari tropa batek mendebaldetik ekialdera zeharkatu du Euskal Herria, Kantauriko eta Mediterraneoko isurialdeak bereizten dituen banalerroan barna. Ekimen horri Urmuga eman zaio izena, eta elkarrekin bultzatu dute Mendiak eta Herriak mendi agentziak, Et Incarnatus Orkestrak eta Sorland Komunikazioa enpresak. Anguloko mendatetik (Araba) abiatuta Hiru Erregeen Mahairaino ailegatu da, bidean zenbait musika emanaldi eskaini ondoan. Kontzertu horietariko batzuk ibilbidearen inguruko herrietan egin dira; beste batzuk, mendi-mendian. Euskarazko komunikazioaren mesedetan burutu den ekintza berritzailea izan da. Urmuga zabaltzeko spotak ederki irudikatzen du proposamen original honen mamia, mendizaletasuna eta musika lotzen baititu irudien ikusgarritasuna eta soinuaren xarma uztarturik.

Epaimahaiburua

Mikel Arregi Aranburu

(Andoain, 1949)

Euskadiko Filmategiko kudeatzaile izan zen 2004-tik 2010. urtera arte, orduan erretiroa hartu baitzuen, eta aurretik ikusentzunezkoen alorrean ekoizpenburu eta kudeatzaile hainbat enpresatan (ETB, Eresoinka, Irusoin, Euskal Media, Pausoka eta Igeldo Komunikazioa). Andoaingo Udaleko zinegotzi izan da urte askoan EAJ-ren ordezkari gisa (1991-2007), eta gaur egun ere Euskararen Normalizaziorako batzordeburu da. Hainbat gizarte mugimendutan ibilia da, besteak beste: Andoaingo Aita Larramendi Ikastolan, Manuel Larramendi Kultur Bazkunean, Elkarbizin eta hainbat kirol elkartetan.

Mahaikidea

Jose Inazio Basterretxea Polo

(Galdakao, 1959)

Kazetaritzan doktore (EHU), gaur egun EHUko Gizarte eta Komunikazio-zientzien Fakultateko irakasle titularra da. Ezagunak dira komunikazioa azterkizun duten bere ikerketa- eta irakaskuntza lanak: Arerioen dualitatea kartel politikoan (EHU,1996); Semiotika eta Masa-Komunikazioa (UEU,1997); Komunikazioaren eta Informazioaren Oinarriak (UEU, 1997); Kultura-aniztasuna eta Gizarte-komunikazioa (UEU, 2002); Aurkari ikusezina, identitateaz eta gizarte-komunikazioaz (Alberdania, 2003). Euskal Telebebistan jardun zuen hamaika urtez, eta sarri kolaboratu du euskal medioekin.

Mahaikidea

Itxaro Borda Xarriton

(Baiona, 1959)

Paueko Unibertsitatean Historian lizentziatua, posta zerbitzuan lan egin du erretiroa hartu arte. Euskal idazle emankorra, eleberria eta olerkia naro landu ditu, baita hainbat sari irabazi ere, horien artean Euskadi Literatur Saria 2002. urtean % 100 basque eleberriagatik. 1982. urtean Maiatz aldizkariaren sortzaileetarikoa izan zen. Hedabide ugaritan kolaboratzaile gisa aritua da, besteak beste Berria edo Argian, eta musikaren munduan ere ekarpenak egin ditu. Itzulpengintzan lan oparoa egin du. Jalgi hadi plazara (2006), Boga boga (2012), Bizitza nola badoan (1984) dira bere lan aski ezagunak.

Mahaikidea

Aingeru Epaltza Ruiz de Alda

(Iruñea, 1960)

Idazle, kazetari eta itzultzailea, kazetaritzan lizentziatua da. Hainbat hedabidetan kazetari jardun ondoren (Deia, Euskal Telebista, Navarra Hoy…), itzultzaile gisa hasi zen lanean Nafarroako Gobernuan eta bertan dihardu gaur egun. Literatur genero ezberdinetan idazle gisa oso ibilbide luze eta oparokoa, Tigre ehizan (1996), Rock’n roll (2000) edoErresuma eta fedea trilogia dira bere obrarik goraipatuenak. Mendi-joak narrazio bilduma (2017) da argitaratu duen azkena.

Mahaikidea

Maite Goñi Eizmendi

(Ordizia, 1967)

Deustuko Unibertsitatean Euskal Filologian lizentziatua eta Ingeles Filologian Euskal Herriko Unibertsitatean. Irakaslea da Mondragon Unibertsitateko HUHEZIn eta euskararen sustapenean, teknologiak hezkuntzako ikas-irakas prozesuetan nola txertatu eta konpetentzia digitalaren inguruko gaietan aditua da. Internet eta IKTetan eskarmentu handikoa, 2010ean Buber saria irabazi zuen euskararen sustapenaren arloko webgunerik onenari eta Ohorezko Buber saria 2016. urtean. Aski ezaguna da hiritartasun digitalari buruz berak egindako lana, bereziki ETB eta Euskadi Irratian.

Mahaikidea

Elixabete Larrinaga Artetxe

(Bilbo, 1964)

Kazetaritzan lizentziatua (EHU) eta doktore Zientzia Politikoa eta Administrazioan (EHU). Gaur egun EHUko Gizarte eta Komunikazio Zientzien Fakultateko irakaslea eta ETBko Albistegi Zerbitzuetako langilea da. Kudeaketa ardurak izan ditu: dekanorde Gizarte eta Komunikazio Zientzien Fakultatean (2007-2009) eta EHUko Nazioarteko Mugikortasuneko zuzendari (2009-2013). Kurutziaga ikastolako presidente izan zen (2010-2013), Euskadi irratirako kolaborazioak egin ditu eta Eusko Jaurlaritzako Euskararen Aholku Batzordeko kide da.

Mahaikidea

Ion Muñoa Errasti

(Zerain, 1985)

Giza Zientziak eta Komunikazioan lizentziatua da (Deustuko Unibertsitatea) eta Gizarte zientzietan doktore (Deustuko Unibertsitatea) iritzi publikoari eta erakunde publikoen komunikazioari buruzko tesiarekin. Egun, Deustuko Unibertsitateko irakaslea eta ikertzailea da, Gizarte eta Giza Zientzien Fakultateko Komunikazio Saileko kide eta komunikazioko ikertaldeko partaide. Unibertsitatetik kanpo, hainbat komunikabidetan kolaboratzaile lanetan aritzen da eta zenbait kultur eta gizarte elkartetan parte hartzen du. Jakintza arlo nagusiak gizarte komunikazio prozesuen eraldaketa, iritzi publikoa eta komunikazio politikoa ditu.

Mahaikidea

Jon Sarasua Maritxalar

(Aretxabaleta, 1966)

Komunikazioaz eta soziologiaz ikasten ibili ondoren 1996an Bi begiratu euskarazko kazetari hizkerari lanarekin doktoratu zen informazio-zientzietan. Bertsolaritzaren munduan oso gazte sartu zen. Euskal Herriko Bertsolari txapelketako finalista ere izan zen 1986an, 19 urte zituela. Bere anaia Aitor Sarasuarekin Fauna txiki bat bertso berritan diskoa kaleratu zuen (Elkar, 1995). Gaur egun plazatik erretiraturik, Mondragon Unibertsitatean irakasle dabil. Hainbat egituraren bultzatzaile izan da, eta hainbat motatako argitalpenak sortu ditu arlo sozioekonomikoan eta hizkuntza gaietan. Garabide elkartearen sortzaileetarikoa ere bada.

Epaimahaiko idazkaria

Patxi Baztarrika Galparsoro

(Ataun, 1958)

Filosofia eta Hezkuntza Zientzietan lizentziatua, Andoaingo euskara teknikaria da 1980. urteaz gero. Gipuzkoako Batzar Nagusietako kide izan zen 1989-1995ean, gero Gipuzkoako diputatu nagusiaren kabineteburu 1999-2003an, Donostiako Udalean zinegotzi 2003-2007an eta Eusko Jaurlaritzan Hizkuntza Politikako sailburuorde 2005-2009 eta 2012-2016ko agintaldietan. Hainbat obra kolektibotan argitaratzeaz gain, besteak beste, Babeli gorazarre saiakera argitaratu zuen 2010ean. Bidegileak bildumarako Rikardo Arregiren biografia idatzi zuen.